تحدث إمام عاشور، لاعب وسط الفريق الأول لكرة القدم بالنادي الأهلي، لأول مرة بعد معاقبته من جانب القلعة الحمراء على خلفية تخلفه عن السفر مع الفريق.
وكان إمام عاشور، قد تخلف عن السفر رفقة بعثة الأهلي إلى تنزانيا، وقرر الأحمر تغريمه 1.5 مليون جنيه وإيقافه لمدة أسبوعين مع التدرب منفردًا.
وكتب إمام عاشور عبر خاصة الاستوري في حسابه على "إنستجرام": "للأسف كلام كتير مغلوط وغير صحيح بيتردد بخصوص اللي حصل، وأنا متقبل أي قرار ياخده النادي، وواثق أنه المسئولين في الأهلي هيتفهموا موقفي كويس".
وتابع: "أنا فعلًا عندي دور برد جامد ودرجة حرارتي عالية وتقلبات في المعدة بشكل غير طبيعي، وباخد مضادات حيوية وللأسف كل أسرتي بتعاني من نفس الأعراض".
وأكمل: "بلغت الدكتور أحمد جاب الله بظروفي الصحية وعدم قدرتي على السفر، وده إجراء غير كافي في مثل هذه الأمور لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر".
طالع.. تقارير: أليو ديانج يوقع عقود انتقاله إلى فريقه الجديد
واستمر: "الموضوع اتقفل خلاص وتواصلت امبارح بالليل مع الكابتن وليد صلاح الدين وأنا تحت أمر النادي وجمهور الأهلي سندي وضهري بعد ربنا سبحانه وتعالى".
وتابع: "بعتذر للنادي والجهاز الفني وزمايلي وقبلهم جمهور الأهلي، أنا فخور باللعب في أكبر نادي في إفريقيا وعلاقتي بجماهيره العظيمة لا تقبل القسمة على اتنين".
وأضاف: "وأرجو من الجميع إغلاق هذا الموضوع والناس اللي بتقول ان إمام عايز يلوي دراع النادي بقولهم حسبي الله ونعم الوكيل محدش يقدر يلوي دراع الأهلي ولا يمكن أفكر بالطريقة دي أبدا".
واسترسل: "انا اتشرفت بارتداء الفائلة الحمراء وبقالي ٣ سنين في النادي والحمد لله عمري ما قصرت لا في حق النادي ولا جماهيره وده حقهم عليا".
وأتم: "ووجودي في الأهلي نادي القرن وفي ضهري جمهور الأهلي يعوضني عن كل حاجة عندنا ماتش بكره مهم، يارب كل التوفيق لزمايلي والجهاز الفني ونحقق الفوز اللي يسعد كل الأهلاوية".
