ميدو: لا أنتمي إلا لـ الزمالك.. و"مدمنين التريند" هم من أثاروا الجدل

حسم أحمد حسام ميدو، نجم الزمالك، الجدل الدائر خلال الأيام القليلة الماضية، منذ إعلانه عدم تشجيع النادي الأهلي في كأس العالم للأندية 2025.

وسُئل ميدو خلال استضافته بأحد البرامج الرياضية، هل ستشجع الأهلي في كأس العالم للأندية، وكانت إجابته صريحة بعدم تشجيع المارد الأحمر، مُشددًا على أنه لا يُشجع إلا الزمالك فقط.

وأثار هذا التصريح جدلًا واسعًا في الأوساط الرياضية خلال الأيام الماضية، وتناولته البرامج الرياضية، والجماهير عبر صفحات التواصل الاجتماعي بين مؤيد ومعارض.

وكتب ميدو عبر منصة "أكس": "‏انا ابن ‎الزمالك، وأكبر فخر ليا في حياتي إني ابن المدرج، ابن الثالثة يمين، بلعب في الزمالك من وأنا عندي 9 سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك".

وأضاف: "بطاقتي وأنا عيل صغير هي كارنيه اتحاد الكرة إللي مكتوب عليه اسم الزمالك.. تتلمذت على إيد مدربين عظماء علموني إني أنتمي لفريقي بس وما أشجعش أي نادي ثاني في مصر بالذات إلا نادي الزمالك أيًا كان بيلاعب مين ولكن في نفس الوقت اتربيت إني أحترم كل المنافسين وأهنيهم لو كسبوا وأبارك لهم وأقول لهم هارد لك لو خسروا".

وواصل: "هو ده معنى الروح الرياضية بالنسبة لي!!، لما اتسألت في الاستوديو هتشجع الأهلي في كأس العالم للأندية رديت بطبيعتي دون أي نفاق أو كذب، لأن بكل بساطة مفيش حاجة في الدنيا تستاهل إنك تكون كذاب ومنافق!، اتفق معاكم إن التوقيت ما كانش مناسب، وبعتذر لأي حد زعل إني قلت الكلام ده في حدث مهم يخص النادي ‎الأهلي، وأنا شايف الناس إللي زعلت بخصوص إن الوقت مش مناسب عندهم كل الحق".

طالع أيضًا | "مبلغ ضخم".. الوداد المغربي يكشف عن قيمة العائد المادي للفرق المشاركة في كأس العالم للأندية

وشدد ميدو: "أما لو اتسألت مليون مرة هتشجع أي نادي تاني في مصر غير الزمالك إجابتي هتكون هي هي عمرها ما هتتغير لغاية لما أموت، أما بخصوص الهجوم إللي بتعرض له فأنا عاذر الناس، لأنهم ممكن يكونوا اتعودوا على إجابات مختلفة في السنوات الأخيرة من ناس تصدروا المشهد في الإعلام وهم أكتر ناس بيأذوا المنافس في الخفاء، وأكتر ناس بتتمنى من قلبها خسارة المنافس من جواهم".

واستكمل: "مش هرد على أي حد هاجمني، لأن بكل بساطة أنا في مرحلة في حياتي شايف إن مفيش حاجة في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس، بالنسبة لي ماتتعداش أكتر من كده!!".

واختتم: "مرة ثانية بعتذر إني كنت سبب في جدال قائم الأيام إللي فاتت، للأسف مش ذنبي، ولكن بسبب مدمنين الترند والدخلاء على كرة القدم إللي لا يمكن يفهموا أبدا عقلية مشجع الكورة!!".