كلمات مؤثرة.. أحمد كوكا يرثي والده المتوفي: بدونه لم أكن سأحترف

رثَّى أحمد حسن كوكا مُهاجم منتخب مصر، والمُحترف في صفوف أولمبياكوس اليوناني، والده المتوفي، بعد التتويج بلقب الدوري اليوناني.

كوكا نجح في التتويج بلقب الدوري اليوناني لموسم 2019/2020 مع أولمبياكوس.

وكتب كوكا عبر حسابه الرسمي بموقع "إنستجرام": "أٔنا مش بحب أتكلم في حياتي الشخصية، بس أنا والدي ده من غيره أنا مش حاجة ولا عمري كنت هبقى حاجة ولا أحقق أي حاجة".

وأكمل: "بابا الله يرحمه من وأنا عندي ٦ سنين وداني النادي الأهلي، كان أكبر حلم له إني أطلع لعيب كورة ويفتخر بي قدام أهله وصحابه، وعلي طول معايا في التمارين والماتشات ولما يكون عنده شغل ومايعرفش يحضر بيخلي حد يصور الماتش عشان يتفرج عليا بعد كدة".

وأضاف: "أيوة حبه لي وإنه يشوفني بلعب كورة كان حاجة تانية، كبرت وجالي عرض احتراف وهو على طول في ضهري، قال لي قبل ما أسافر كلمتين مش هنساهم لآخر يوم في حياتي".

وتابع: "(عايزك ماترجعش مصر غير وإنت مشرفني برة، عايز أفتخر بيك وسط أهلي) قلت له إن شاء الله يا بابا".

وأكمل: "سافرت وفي اول شهر نزلت التمرين ولما رجعت كان في مطافي وبوليس كتير عند بيتي، فبصيت لاقيت شقتي كلها بتتحرق، كل حاجة كانت عندي في الشقة راحت، كلمت بابا وقلت له أنا عايز أرجع مش قادر على الغربة واللغة صعبة وبعد اللي حصل ده يمكن ربنا مش رايد إني أكمل هنا".

وأردف: "قال لي أنا بكرة الصبح هجيلك، بابا تاني يوم كان عندي وجايب لي لبس جديد كتير واداني فلوس عشان أجيب اللي عايزه وقال لي (أنا جيت عشان أفكرك إنك مش هترجع غير لما تشرفني وتشرف بلدك، إنت فاكر إنها سهلة؟ اللي حصل ده يقويك مش يخليك تستسلم)".

وأنهى تصريحاته قائلًا: "الحمد لله علي كل حاجة بس أنا من غير والدي ماكنتش كملت، الله يرحمك يا أطيب وأحن وأرجل إنسان شوفته في حياتي، كان نفسي تبقي معايا وتفرح بي، إن شاء الله نتجمع تاني في الجنة".

يُذكر أنّ كوكا يلعب معارًا مع أولمبياكوس، قادمًا من سبورتينج براجا البرتغالي، حتى نهاية الموسم الجاري.